يازينكم وانتم تذاكرون ..
كل حتسيكم ( بكره عندي اختبار ) (ماجاوبت اليوم ) تسذوبييييين .. تذكروني بجزاع التسلب الدافور يوم نسأله بعد الأختبار (هاه حليت) ويقول والله ماعرفت اكتب اسمي ..
واذا جت النتايج لقيناهم رازّين اسمه اول واحد بجدار المتفوقين واسامينا حاطينها بورقه بجدار بعيد مكتوب فيه بالأحمر ( سيّرو علينا مرتن ثانيه عشان تاخذون موعد اختبارات الدور الثاني )
يوم اني بالثانوي : كانت امي تقول تبي شاهي ، مويه ، عصير ، كافي ، مرقه .. تدلل انت واطلب اللي تبي بس جب نتيجتن زينه تبيض الوجه
ولا تسّود الوجه مثل ولد خالتك فهيد ..
قبل فتره جلست اتفرج على كتبي المتكدسه بالغرفه حقت الثانوي والمتوسط ومليانه غبار
تواقيع وصور شينه وحتسي وصخ
لقيت لي رسمه شينه في كتاب الجغرافيا مع اني ماكنت اعرف ارسم لكن بالحصه تتفجر المواهب الأبداعيه .؟.
مدرس الجغرافيا كان شيـــن وفي وجهه 44 حبه خال . مره سألته : ليش وجهك فيه ذبان ماقد طار من جيتنا للمدرسه .
هزأني وفشلني وقال انت اصلا ماتأدبت . رجعت البيت وعلمت ابوي عشان يروح ياخذ حقي منه يوم انه يفشلني قدام العيال . وجا باتسر ورحت لبوي عند المدير وصفقني قدام المدير والمدرس وجالسين يتبسّمون ههههههه
ناديت ابوي ابيه يوقف معي وليتني مارحت له ..
لين اللحين اثار الشاهي بسقف غرفتي مخليها ذكرى .
لجابت امي لي شاهي خذت الليبتون ورصيته بالجدار عشان تعطي شكل حلو ويبسّت مع الأيام وصار كنها ثريات
الله يذكرك بالخير يااستاد عوض
مدرس حبيب كان يجي يتقهوى عند ابوي ويقول : ياخي ولدك حاولنا معه بكل الطرق انه يجاوب صح لكن لا حياه لمن تنادي .. ولدك يبي له اعادة هيكله ..
ياشينها لا صرت تدرس بمدرسه وواحد من المدرسين يعرف ابوك ويجيبه البيت ويصير محجر لك على طول بالفصل ولا تقدر تصير عنده صايع نمره واستماره .
اه ياحبي لأميمتي كانت بالمتوسط تسوي لي زعتر من البيت وتقول لا تاكل من مقصف المدرسه عشان اكلهم موب زين . والمشكله كان زعتر ناشف وينشف الفم
اشوى اني كنت اسرق منها واروح اشتري من مقصف المدرسه المخيس على اقل اللبنه احسن من زعتر امي
ياحليلها ماتعرف تدّس دراهما عني ..
كان المكان السري عندها تحت كنب الصاله .. ولا كانت تحط صرف خمسين ريالات تحت خلاقينها بالدولاب واجي اسحب دراهمها وهي ماتدري
ياصبرها علي , سروق ومعقدها من صغري وبالدف انجح من اول مادرست لين تخرجت من الثانوي وخذت الشهاده بعد شق الأنفس ..
ياخي صيرو زيي
خلو الدراسه والغثا عنكم
يعني مصدقين اللحين انتو ووجيهكم انكم بتتوظفون .. خاصتن الحريم مخهم كله دراسه وتذاكر الوحده عن عشر شباب وفي الأخير مالها مستقبل الا مدرسّه ولا تلقى تعيين الا بعد طلعه الروح هذه ان لقت بين مليون وحده تبي نفس الوظيفه
لأنه مالهم الا القطاع التعليمي ..
اقعدي بالبيت لين يجي رجلتس وياخذتس وخلي عنتس المهايط ..
المصدر: منتديات بنات كوول